د نهاد جوانان مسلمان (نجم) له خوا جوړه شوې د سیرت ستوري سیالۍ دوه سوه ګټونکو ته نن د کابل عیدګاه کې ګران بیه جایزې ورکړل شوې.
د سیالۍ لومړۍ جایزه سعودي عربستان ته د حج سفر، چې د افغانستان د حج او اوقافو وزارت له خوا اعلان شوې وه؛ ورپسې لس ګونه لپ ټاپونه، موبایلونه، ټابلیټونه، موټر سایکل، بایسیکلونه او د کتابونې بستې وې.
د سیرت ستوري سیالۍ تیره جمعه، د حوت د میاشتې په ۱۵مه کابل کې وشوه، چې د کابل ښار او ولسوالیو له ۵ زره ډیرو هلکانو او نجونو پکې برخه اخیستې وه.
د نجم د عامه اړیکو مشر مدثر اسلامي په وینا د دې سیالۍ اصلي موخه په ځوانانو کې د دیني لارښوونو او په ځانګړي ډول د رسول الله صلی الله علیه وسلم د ژوند د رسونو عامول دي.
د سیالۍ د ازموینې کمیټې مشر حمزه مومن حکیمي وویل، چې د پارچو د کتلو پروسه دومره رڼه او پټه وه، چې تر وروستۍ شیبې د کمیټې له غړو پرته هیڅ چا ته ګټونکی نه و معلوم.
یوې ګډون کوونکې مرسل د سیالۍ له پروسې خوښي څرګنده او کړه او د سیالۍ له مسئولینو یې مننه وکړه، چې هلکانو او نجونو ته د مطالعې او زده کړې زمینه برابروي.
نهاد جوانان مسلمان، افغانستان کې د ځوانانو تر ټولو اسلامي ټولنه ده، چې موخه یې د ځوان نسل داسې روزنه او تنظیم دی، چې په ټولنه کې د مثبت بدلون او ملي پرمختګ لامل شي.
نجم د هیواد په ۲۶ ولایتونو کې د ځوانانو لپاره بیلا بیلې دیني، تعلیمي، فرهنګي، تفریحي، ورزشي او اجتماعي برنامې جوړوي، چې په لس ګونه زره ځوانانو پکې برخه اخلي.